O traballo de Dixardín no Concello de Carballo, recoñecido co Premio Nacional de Parques e Xardíns
O Concello de Carballo vén de recibir o Premio Nacional de Parques e Xardíns Públicos na categoría de municipios de menos de 50.000 habitantes, un recoñecemento que outorga a Asociación Española de Parques e Xardíns Públicos (AEPJP). Este galardón recoñece a calidade e sostibilidade do mantemento das zonas verdes municipais, un labor que dende hai seis anos desenvolve Dixardín.
A entrega do premio tivo lugar durante o Congreso anual da AEPJP celebrado en Marbella. Ao acto acudiron o concelleiro de Medio Ambiente e Servizos, Miguel Vales; o técnico asesor de Medio Ambiente, Santiago Andrade; e o xerente de Dixardín, Carlos Iglesias.
Para Dixardín este galardón resulta un orgullo porque contribúe a visibilizar a nivel nacional o traballo que desenvolven no municipio e a súa aportación no deseño e construción de espazos verdes, saudables e que apostan por vexetación autóctona.
Dixardín asumiu en 2019 o mantemento de espazos verdes municipais de Carballo. Ademais dunha mellora nestas zonas, contribúese no emprego inclusivo, xa que esta iniciativa empresarial ofrece oportunidades laborais a persoas con discapacidade.
