Dixardín leva os Hortos Urbanos a BioCultura A Coruña con obradoiros sobre natureza e cultivo sostible
Dixardín participou os días 6, 7 e 8 de marzo na feira BioCultura A Coruña, celebrada en EXPOCoruña, un dos encontros de referencia arredor dos produtos ecolóxicos, o consumo responsable e o ecoturismo.
A presenza de Dixardín desenvolveuse no marco do proxecto Hortos Urbanos da Deputación de Lugo, unha iniciativa que promove a agricultura ecolóxica, o coñecemento do medio natural e o aproveitamento dos espazos urbanos para o cultivo e a educación ambiental.
Dentro da programación de actividades da feira, o proxecto Hortos Urbanos organizou diversos obradoiros divulgativos abertos ao público, nos que se abordaron distintas temáticas relacionadas coa natureza, a sustentabilidade e a cultura vinculada ao territorio.
Entre as propostas realizadas ao longo da fin de semana destacaron:
- “O marabilloso mundo dos fungos: curiosidades micolóxicas”, un obradoiro para descubrir o papel dos fungos nos ecosistemas e achegarse á micoloxía dun xeito divulgativo.
- “Haikus e natureza”, unha actividade creativa que combinou literatura e medio natural a través desta tradicional forma poética xaponesa.
- “Sensibilidade e conciencia forestal”, centrado na importancia da conservación e no coñecemento dos ecosistemas forestais.
- “Enxertado de maceiras autóctonas de Galicia”, dedicado á recuperación e conservación das variedades tradicionais de maceira e ás técnicas básicas de enxerto.
Estas actividades permitiron ás persoas asistentes achegarse de forma práctica ao mundo da natureza e da agricultura ecolóxica, ao tempo que se fomentou o coñecemento e o respecto polo medio ambiente.
A participación nesta edición de BioCultura supuxo tamén unha oportunidade para dar visibilidade ao proxecto Hortos Urbanos e compartir experiencias con outras iniciativas vinculadas á sostibilidade, reforzando o compromiso de Dixardín coa educación ambiental e coa promoción de prácticas agrícolas respectuosas co territorio.
