Gran participación nos obradoiros de poda e enxerto desenvolvidos en Carballo

Preto de cen persoas participaron nos cursos de poda e enxerto de froiteiras nos que colaborou activamente Dixardín, en coordinación co Concello de Carballo. As accións formativas desenvolvéronse nas parroquias de Oza, Sofán e Carballo ao longo do mes de febreiro, completando as tres sesións previstas cunha alta participación e interese por parte da veciñanza.

Desde Dixardín valorouse moi positivamente a acollida destes obradoiros, nos que se compartiron coñecementos prácticos sobre o coidado e mantemento de froiteiras, fomentando a conservación das variedades autóctonas e as boas prácticas no ámbito agrícola. Esta colaboración enmárcase no compromiso da entidade coa formación, a dinamización do territorio e a creación de oportunidades vinculadas á economía social e ao emprego inclusivo.