Carballo, recoñecido cos Premios COGAMI 2025: un recoñecemento que fala de compromiso e coidado compartido
O pasado venres 17 de outubro, celebramos con grande emoción o 35º Aniversario de COGAMI, nun acto que puxo en valor a loita pola igualdade e a participación plena das persoas con discapacidade. Entre os momentos máis destacados da xornada estivo a entrega dos Premios COGAMI 2025, onde o Concello de Carballo recibiu o Premio á Iniciativa Institucional, un galardón que recoñece o compromiso real coa inclusión social dende o ámbito local.
Compromiso compartido, resultados visibles
Para Dixardín, este recoñecemento é tamén motivo de celebración. Desde hai anos, compartimos co Concello de Carballo unha visión: facer da xestión dos espazos verdes unha oportunidade de transformación social.
Xuntos impulsamos un modelo de traballo que combina profesionalidade no coidado dos espazos urbanos, compromiso ambiental e, sobre todo, impacto social positivo mediante a inserción laboral de persoas con discapacidade.
A través desta colaboración, a inserción laboral de persoas con discapacidade convértese nunha realidade cotiá, visible e valorada. Non se trata só de manter en perfecto estado a paisaxe urbana: tratamos de construír un modelo que xere oportunidades, fomente a igualdade e dea sentido ao traballo en equipo.
Concellos que marcan a diferenza
Queremos felicitar ao Concello de Carballo, e en especial ao seu alcalde Daniel Pérez, que recolleu o premio da man do vicepresidente de COGAMI, Ramón Sestayo Lestón. Grazas por confiar en proxectos que poñen as persoas no centro e por demostrar que é posible avanzar cara a unha sociedade máis xusta desde o ámbito local.
En Dixardín seguiremos traballando con esa mesma filosofía: porque coidar da contorna tamén é coidar das persoas. E porque medrar xuntas —como vimos facendo en Carballo— é a mellor forma de avanzar.
