Dixardín colabora un ano máis na campaña “Presume de xardíns” para celebrar o Samaín en Carballo

Coa chegada do Samaín, Carballo énchese de cor, cabazas e flores. Un ano máis, dende Dixardín colaboramos coa área de Medio Ambiente do Concello na nova edición da campaña “Presume de xardíns”, unha iniciativa pensada para poñer en valor as zonas verdes e fomentar o coidado e respecto polos espazos públicos.

Xardíns que unen comunidade e creatividade

A campaña forma parte do programa de sensibilización ambiental “Catro estacións”, e nesta ocasión convida aos nenos e nenas dos colexios de Carballo a participar decorando os xardíns municipais con cabazas personalizadas.
Unha actividade divertida e creativa coa que tamén se busca implicar á infancia no coidado da contorna e promover unha conciencia cívica e ambiental dende idades temperás.

Desde Dixardín sumámonos con entusiasmo a esta iniciativa, colaborando na preparación e mantemento das zonas verdes onde se colocarán as cabazas: rúa Eduardo Pondal: rúa Campo da Feira, Parque do Anllóns; Parque do Chorís; Exterior do CEIP Nétoma-Razo e Praza de Sofán.

O Samaín florece con crisantemos

Durante estas semanas, os crisantemos (Chrysanthemum indicum) son os grandes protagonistas dos xardíns municipais. O equipo de Dixardín encárgase de plantar, coidar e manter estes exemplares que enchen de vida e cor os espazos públicos, ofrecendo á veciñanza un Carballo máis acolledor e fermoso.

Compromiso social e ambiental

Para nós, participar en “Presume de xardíns” é máis que unha colaboración: é unha oportunidade para visibilizar o traballo das persoas que forman parte de Dixardín, profesionais comprometidas/os coa sostibilidade e coa mellora continua dos espazos verdes do noso municipio.
A súa dedicación diaria é clave para que Carballo siga sendo un exemplo de conciencia ambiental, inclusión social e beleza natural.

Seguimos presumindo de xardíns… e de equipo!