Dixardín explora novas liñas de actividade a través dun proxecto que financia CEPES

A Confederación Empresarial da Economía Social (CEPES), en calidade de Organismo Intermedio do Programa Operativo de Inclusión Social e Economía Social (POISES) do Fondo Social Europeo (FSE) 2014-2020, publicou en xuño do 2020 unha axuda dirixida á mellora da competitividade e medidas de consolidación empresarial das empresas de inserción, cooperativas de iniciativa social, centros especiais de emprego de iniciativa social e outras entidades da economía social.

Dixardín é unha das entidades colaboradoras no marco do proxecto denominado “Plan para a creación e testeo dunha liña de asesoramento en sustentabilidade e accesibilidade universal a concellos por parte do Grupo Galega de Economía Social”.

Esta iniciativa contempla os seguintes obxectivos a cumprir ao longo de once meses, dende xuño do 2021 ata xullo de 2022:

1. Conformar un equipo de traballo técnico entre empresas nas que cada perfil aporte coñecemento complementario ao equipo, en función do seu ámbito de experiencia. Dixardín aporta coñecemento técnico en xestión de zonas verdes.
2. Testar as potencialidades que ofrecen ámbitos como a sustentabilidade e a accesibilidade universal para explorar potenciais liñas de negocio para o Grupo.
3. Sensibilizar e propoñer melloras vinculadas á sustentabilidade e accesibilidade universal nos concellos cos que se realice este proxecto (Muros, Corcubión e Mazaricos).