Carballo, cidade xardín
Dentro das cidades, contornas con demasiado consumo, demasiados refugallos e demasiado cemento, os xardíns, as árbores, as terrazas, e mesmo unha simple maceta, achegan un toque de natureza, cumprindo funcións esenciais como producir osíxeno e absorber partículas contaminantes, aumentar a diversidade de especies animais e ofrecer un espazo para o descanso e o lecer. En resumo: calidade de vida.
Por iso, aínda que a cidade achéganos comodidade e moitas oportunidades, algo no noso interior goza en contacto coa natureza. O xardín é unha boa maneira de achegarnos a ela, de participar e de recrear os procesos da vida, rodeándonos dun ambiente harmónico e tranquilo.
Pensar en verde
O concello de Carballo é un bo exemplo de compromiso na conservación e mellora da súa infraestrutura ecolóxica para que a natureza na cidade configure unha auténtica rede verde que beneficie a todas as persoas.
En colaboración con Dixardín, aposta por impulsar un incremento de espazos verdes e un modo de xestionalos en favor da conservación e mellora da biodiversidade, do patrimonio natural e dun contacto máis rico da cidadanía coa natureza urbana.
Porque a idea dun xardín sostible vai máis aló do mero espazo verde: supón a posibilidade de realizar un cambio na maneira de facer as cousas.
