Dixardín impulsa en Carballo obradoiros de cestería contemporánea para a recollida de cogomelos
Desde Dixardín, en colaboración coa Concellaría de Medio Ambiente do Concello de Carballo, estamos encantadas de formar parte dunha iniciativa que une natureza, creatividade e sostibilidade: dous obradoiros de cestería contemporánea con madeira cortada a láser, especialmente pensados para a recollida de cogomelos e froitos de tempada.
O pasado sábado 4 de outubro, 15 persoas participaron na primeira sesión celebrada no Centro Social Escola de Arrabaldes, e outras tantas están inscritas para a seguinte xornada, que terá lugar o sábado 11 de outubro.
Os obradoiros están dirixidos por Fabián Lage, artesán, escultor e docente con máis de 28 anos de experiencia en carpintaría artística, restauración patrimonial e escultura urbana. Nesta ocasión, o alumnado está a aprender a crear a súa propia cesta funcional, combinando técnicas tradicionais con tecnoloxías como o corte a láser e acabados respectuosos co medio, utilizando ceras naturais.
Cada sesión ten unha duración de cinco horas (de 09:00 a 14:00), e está dirixida tanto a público mozo como adulto. A formación estrutúrase en bloques dinámicos que combinan presentación, montaxe, tratamento de acabados e unha reflexión final, fomentando non só a creación artesanal senón tamén o pensamento sostible.
En Dixardín seguimos apostando por proxectos que conectan ás persoas coa natureza a través do saber facer artesanal, o respecto pola contorna e a colaboración comunitaria. Grazas a todas as persoas que están a facer posible esta experiencia!
