Dixardín participa un ano máis nas XVI Xornadas Micolóxicas de Carballo
As fins de semana do 18 e do 25 de outubro, Carballo volverá converterse nun punto de encontro para as persoas amantes da natureza, da ciencia e da gastronomía, coa celebración das XVI Xornadas Micolóxicas, organizadas polo Concello de Carballo en colaboración coa AC Lumieira e Dixardín.
Desde Dixardín, enorgullécenos formar parte deste evento xa consolidado, que ano tras ano contribúe a achegar o fascinante mundo dos fungos ao público xeral. A nosa participación enmárcase no compromiso coa divulgación ambiental e a educación naturalista, piares fundamentais da nosa actividade.
Un programa para descubrir, aprender e saborear
O obxectivo destas xornadas é fomentar o coñecemento micolóxico e promover un vínculo respectuoso co medio natural. Para iso, o programa inclúe:
- Saídas guiadas ao monte con persoas expertas en micoloxía, onde as persoas asistentes poderán aprender a identificar distintas especies de fungos no seu hábitat.
- Charlas divulgativas sobre etnomicoloxía, que abordarán a relación entre as persoas e os fungos en diferentes culturas: usos culinarios, medicinais, rituais e artesanais.
- Obradoiros de clasificación e exposición de exemplares, nos que se poderá observar a enorme diversidade micolóxica da nosa contorna.
Desde Dixardín, cremos que coñecer é o primeiro paso para conservar, e estas xornadas son unha oportunidade excelente para descubrir o valor ecolóxico, cultural e gastronómico dos fungos.
Inscrición aberta
As prazas son limitadas e o prazo de inscrición ábrese hoxe mesmo. Animamos a todas as persoas interesadas a participar e desfrutar desta experiencia única que combina ciencia, natureza e comunidade.
Pódese consultar máis información e reservar praza a través do Concello de Carballo ou poñéndose en contacto coas entidades organizadoras.
¡Vémonos entre cogomelos!
