Dixardín impulsa a formación en igualdade, prevención do acoso e comunicación respectuosa
Dixardín continúa avanzando no seu compromiso coa creación de contornas laborais seguras, inclusivas e respectuosas a través da formación continua do seu equipo.
A finais de 2025, un total de 14 persoas traballadoras da entidade participaron nunha acción formativa centrada na prevención do acoso, a igualdade e a mellora da comunicación interpersoal no ámbito laboral.
Esta formación, impartida por INTHEMOVE, enmárcase no proxecto “A Atención Integral Centrada na Persoa e a Sostibilidade Ambiental: Pancadas para o mantemento do emprego e o fortalecemento do negocio en COGAMI Empresarial”, cofinanciado polo Fondo Social Europeo Plus (FSE+) dentro do programa EFESO 2021-2027, a través de CEPES.
Durante as sesións abordáronse cuestións clave relacionadas coa identificación das distintas tipoloxías de acoso —sexual, por razón de sexo, discriminatorio ou psicolóxico— así como a diferenciación entre conflito laboral e condutas inadecuadas, incidindo na importancia de actuar de forma temperá e adecuada ante este tipo de situacións.
Así mesmo, afondouse no coñecemento do protocolo interno de prevención e actuación fronte ao acoso, reforzando o papel de todas as persoas que forman parte da organización na construción dun espazo de traballo libre de violencia e discriminación.
Outro dos eixes centrais da formación foi a mellora da comunicación no equipo. A través da introdución de ferramentas de comunicación non violenta, traballouse a capacidade de expresar necesidades, emocións e propostas de maneira clara e respectuosa, favorecendo a xestión positiva dos conflitos e o fortalecemento das relacións profesionais.
Esta acción formativa permitiu, ademais, reflexionar sobre a importancia da cultura organizativa e do clima laboral, promovendo valores como o respecto mutuo, a colaboración e a corresponsabilidade.
Con iniciativas como esta, Dixardín reafirma o seu compromiso co benestar das persoas traballadoras e coa construción dun modelo de organización centrado nas persoas, no que a igualdade de oportunidades e o respecto son piares fundamentais.
