Coidar as plantas de interior

As plantas de interior axúdannos a darlle ao noso fogar un toque de cor e vitalidade. Pero son moito máis que iso: achégannos á natureza, desprenden alegría e transmiten tranquilidade e harmonía. Será por iso polo que nos gustan tanto?

Decorar a casa con plantas é toda unha habilidade, pero aínda o é máis saber coidalas correctamente e mantelas sempre bonitas. Por iso, con esta guía de xardinería, explicámosche de forma sinxela as nocións básicas que podes seguir para que se manteñan cheas de vida como o primeiro día.

Como elixir o sitio perfecto? Fundamental: pensa na luz

Elixir o sitio perfecto para a planta non só é unha cuestión estética, senón que tamén inflúe na propia supervivencia da planta. Para descubrir que plantas se adaptaran ao teu espazo, ten en conta a luz solar da que dispós. Dependendo do tipo de planta, algunhas serán máis resistentes á cantidade de luz que reciben que outras. E é que, aínda que non o creas, non a todas as plantas lles senta ben recibir moita luz do sol, ou polo menos recibila de forma directa.

Infórmate sobre as características da túa planta e observa como se comporta a luz na túa casa co paso das horas. Iso darache as pistas necesarias para coñecer que zonas e recunchos son os máis luminosos e cales non.

Deixa que se adecúen ao espazo e á terra

É fundamental observar ás plantas para saber o que necesitan: máis auga, menos, máis espazo, máis luz… Se te fixas ben, verás como “che falan” para dicirche que lles fai falta.

Normalmente non é necesario transplantalas durante o primeiro ano, polo que as podes deixar tal e como están, sen necesidade de darlles un maior espazo nunha maceta máis grande.

Por suposto, coloca sempre un prato na parte inferior da maceta, porque axuda a drenar o exceso de auga.

Non desperdicies auga

Debemos facer un consumo responsable e aforrar auga, xa non só polo mantemento das plantas, senón pola nosa responsabilidade co medio ambiente.

A maioría das plantas de interior prefiren unha rega inferior, é dicir, desde a base, onde están as raíces. Así que, o primeiro dos nosos consellos é que reúnas todas as túas plantas e lles deas “un baño” regularmente. Colócaas nunha superficie que poidas cubrir cun par de dedos de auga e déixaas un intre para que se nutran.

Asegúrate de que as túas macetas teñan buracos para unha correcta drenaxe e non estean en todo momento en continuo contacto coa auga. Coida o nivel de humidade do ambiente. O óptimo é que a terra da planta sempre estea algo húmida (non mollada).

Empeza con plantas sinxelas

Non tes por que lanzarte sen máis e encher a túa casa de plantas se non tes experiencia no seu mantemento. Por que non empezar aos poucos? Comeza cunha planta que sexa sinxela de coidar e che permita aprender a adaptar estas rutinas de mantemento ao teu día a día dunha forma cómoda.

Algunhas das plantas de interior máis resistentes e fáciles de manter para iniciarse no marabilloso mundo da xardinería son, por exemplo, a campanula portenschlagiana, a sansevieria trifasciata, o ficus benjamina ou a lavandula.